मस्यौदाय् सहलह क्वचाल

सांस्कृतिक व सामाजिक ऐक्यबद्धताया आधार निर्धारण समितिया अवधारणा व मस्यौदा दथुइ संविधानसभाय् सहलह क्वचा:गु दु ।

बिहीवा: न्हिनय् छताः ई जुयाः जःछि पुलाः वनेधुंकाः न्ह्याःगु सहलहस ब्वति काःपिं सभासद्तय्गु दथुइ थौं नं 'जनयुद्ध' खँग्वः तयेगु मतयेगु व सरकारी ज्याखँया भाय् छु भाषायात दयेकेगु धइगु विषयसं बहस न्ह्याःगु दु ।

बैठकय् न्वंवानादिसें माओवादी सभासद् लोकेन्द्र विष्टं मस्यौदाय् जनयुद्ध धइगु खँग्वः तयेवं सर्गः हे कुतुं मवइगुलिं मेपिनिगु अस्तित्व स्वीकार याये सयेकेमाःगु धयादीगु दु । अथेहे भाय् सम्बन्धी विवादबारे वय्कलं न्वंवायेत न्ह्याःगु भाय् न्वंवासां नं ज्या ख्यलय्या भाषा धाःसा आ:यात खस भाय् हे जुइमाःगु खँय् ब:बियादीगु दु ।

अथेहे नेपाली कांग्रेसया सभासद् लक्ष्मणप्रसाद घिमिरें झिंनिगू बुँदे समझदारी निसें आःतक नं 'सशस्त्र द्वन्द्व' खँग्वः न्ह्यथनातःगुलिं न्हूगु संविधानय् नं थ्वहे खँग्वः तयेगु पाय्छि जुइगु धयादीगु दु । एमालेया सभासद प्रदीप ज्ञवालीं बहुभाषिक व बहुसांस्कृतिक देशय् फुक्कसिनं छम्हसिनं मेम्हसिगु समुदायया संस्कृति व परम्परायात सम्मान यायेफुसा जक सामाजिक ऐक्यबद्धता दयेके फइगु धयादीगु दु ।

मधेशी जनअधिकार फोरमया चन्द्रिकाप्रसाद यादव व तराई मधेश लोकतान्त्रिक पार्टीया वृजेशकुमार गुप्तां मधेशी जनताया स्वापू भाय् हिन्दी जूगु दाबी यासें तराईलय् च्वनीपिं अप्वसिनं खस् भाय् मथुइगु कारण हिन्दी भाय्यात नं सरकारी ज्या ख्यलय्या भाय्या मान्यता बिइमाःगु धयादीगु दु । राष्ट्रिय जनमोर्चाया नायः चित्रबहादुर केसीं खस भाय् यात स्वापूया भाषा दयेकाः 'सशस्त्र द्वन्द; धइगु खँग्वः तयेवं छु नं विवाद मजुइगु धयादीगु दु ।

समितिया अवधारणा व मस्यौदादथुइ सभासद्तय्सं न्वंवायेगु ज्या क्वःचायेवं समितिया सभापति नबोदिता चौधरीं 'सांस्कृतिक व सामाजिक ऐक्यबद्धताया आधार निर्धारण समितिया अवधारणालिसेया प्रारम्भिक मस्यौदा सम्बन्धी प्रतिवेदन २०६६' दथुइया सहलहस पिदंगु न्ह्यसःया लिसः बिइगु ज्या नं जूगु खः ।

थ्व स्वयां न्ह्यः थौं हे च्वंगु समितिया बैठकय् एकीकृत नेकपा (माओवादी)या सभासद्तय्सं संविधानसभाय् छ्वइगु मू अवधारणा पौसं जनयुद्ध धइगु खँग्वः मतःगु खँय् च्यूताः प्वंकूगु ख: । संविधानसभाया बैठकय् मू अवधारणा न्ह्यब्वयेगु निंतिं समितिया थौं च्वंगु बैठकय् माओवादी सभासद्तय्सं च्यूताः प्वंकूगु खः । माओवादी सभासद सन्तोष बुढा मगरं जनयुद्ध धइगु खँग्वः तयेवं छम्हसिनं मेम्हसिगु अस्तित्वयात स्वीकार याइगु व थुकिं दलत दथुइया स्वापू अझ बांलाइगु बिचाः तयादीगु खः । अथेहे थीत्यः मत्यः सामाजिक अपराध जक मजूसे मानवताया अपराधयारुपं स्वीकार यायेमाःगु सामाजिक सुरक्षाया ठोस परिभाषा जुइमाःगु आदिवासी जनजातिया विषयसं आपालं खँत ल्ह्वनेमाःगु अदालती ज्याख्यलय्या भाषाय् बहुभाषिक नीति छ्यलेमाःगु लगायतया विषयसं नं सभासद्तय्सं सुझाव ब्यूगु दु ।