सरकारय् ब्वति कायेत प्रधानमन्त्रीया इनाप
प्रधानमन्त्री माधवकुमार नेपालं सरकार पिनेया दक्वं दलतय्त सरकारय् ब्वति कायेत इनाप यानादीगु दु ।
बिहीवाः येँय् आदिवासी जनजाति उत्थान प्रतिष्ठान संचालक परिषया खुक्वःगु बैठकया उल्लेज्या यनादिसें वयेकलं संविधान निर्माणया निंतिं दक्वं दलया भुमिका महत्वपूर्ण जूगुलिं सरकारय् ब्वति कयाः संविधान निर्माण यायेत इनाप यानादिल ।
प्रधानमन्त्री नेपालं आः खँ जक मजूसे ज्यां चमत्कार क्यनेगु ई वःगु धयादीगु दु । थःगु हे पार्टीया ग्वाहालि मदुगु कारणं सरकारया नेतृत्व याःसां नं ज्या यायेमफुगु स्वीकार यानादीम्ह नेपालं थौं धाःसा चमत्कार खँ क्यनेगु धयादीगु खः ।
ज्याझ्वलय् प्रधानमन्त्री नेपालं सरकार विरुद्ध भ्रम सिर्जना यानाः नागरिक अधिकारय् खेलवाड यायेगु ज्या जुयाच्वंगु धयादिसें सरकारयात पीडाबोध जुइ कथंया ज्या मयायेत व अभिव्यक्ति मबीत दक्वसितं इनाप यानादिल । वयेकलं ईलय् हे संविधान निर्माण जुइगु दाबी यानादिसें फुक्कं संविधान निर्माण यायेगु ज्याय् लगेजुमाःगु बिचाः प्वंकादिल ।
ज्याझ्वलय् प्रधानमन्त्री नेपालं शान्ति प्रक्रियायात सार्थक निष्कर्षय् थ्यंके फुसा जक आदिवासी जनजाति व सीमान्तकृत समुदायया उत्थान यायेफइगु धयादीगु दु । आदिवासी जनजाति व सीमान्तकृत वर्गया हितया निंतिं सरकार न्ह्यात्थेंज्याःगु ग्वाहालि यायेत तयार दुगु वय्कःया धापू दु ।
प्रतिष्ठानया पदतया नं नायः जुयाः च्वनादीम्ह प्रधानमन्त्री नेपालं हरेक जातिया आत्म सम्मानलिसेया म्हसीका कायम यायेत व केन्द्रीय व क्षेत्रीयस्तरय् संग्रहालय दयेकेत प्रक्रिया न्ह्यायेधुंकूगु जानकारी बियादीसें वयेकलं आदिवासीतय् निंतिं सरकारं पर्याप्त बजेट फ्याइगु धयादिल ।
