झिम्हय्सिया नेपा:मितय् सीम्ह लुल
संयुक्त अरब इमिरेट्स (युएई)या दुवईपाखें कतारया दोहा वनाच्वंगु लः जहाज मंगलवाः समुद्रय् दुनाः उकिइ दुपिं झिंनिम्ह नेपाःमित सीगु दु । जहाज दुर्घटनालिपा तंनाच्वंपिं मध्ये निम्ह नेपा:मिया सीम्ह बुधवा: लुइकूगु खःसा ल्यं दुपिं झिम्हय्सिया सीम्ह बिहीवा: सुथय् लुइकूगु दु ।
कतारया निंतिं नेपाली राजदूतावासं जानकारी ब्यूकथं सीपिं मध्ये सनाखत जूपिं महोत्तरीया शेषनाथ यादव व पाल्पाया तिलकबहादुर खाम्ता जूगु जानकारी ब्यूगु दु । अथेहे मेपिं सीपिं मध्ये नवलपरासीया घनश्याम सार्की, धादिङया गंगाबहादुर गुरुङ, रोल्पाया जयबहादुर पुन मगर, बागलुङया लीलाराम पौडेल अथेहे पर्वतया ऋषिप्रसाद शर्मा पौडेल, बाराया मेहदी हुसेन मिया, दाङया शंकर विष्ट, अर्घाखाँचीया मानिसंह खत्री व महोत्तरीया राजीव कुमार दत्तिपिं खः ।
सीपिनिगु टिकटया आधारय् नां लुयावःसां सुयाःगु सीम्ह गुख: धकाः सीकेमफुगु परराष्ट्र मन्त्रालयया प्रवक्ता मदन कुमार भट्टराईं जानकारी बियादीगु दु । वय्कलं सीम्ह सुयागु खः धइगु प्रष्ट जुइवं हे नेपाः हयाः छेँजःपिंत लःल्हायेगु जानकारी बियादीगु दु ।
