सिंहया स्वास्थ्य अवस्था आः खतरामुक्त
छुं दिंन्ह्य: निसें म्ह मफया येँया थापाथलीसं च्वंगु नर्भिक अस्पतालय् वासः याका च्वनादिम्ह वरिष्ठ गणतन्त्रवादी नेता रामराजाप्रसाद सिंहया स्वास्थ्य अवस्था आः खतरामुक्त जूगु दु ।
स्वन्हु न्ह्यःनिसें तसकं म्ह मफयेवं यंकूम्ह नेता सिंहया स्वास्थ्य अवस्था आः खतरामुक्त जूगु खँ नर्भिक अस्पताल स्रोतं जानकारी ब्यूगु दु । वासः याकाच्वंम्ह सिंहयात नापलायेत बिहीवा: सुथय् राष्ट्रपति डा. रामवरण यादव नर्भिक अस्पताल झायादीगु खः । सिंह राष्ट्रपति चुनावया झ्वलय् माओवादीयापाखें उम्मेदवार जुयादीगु खःसा यादवयात कांग्रेसं उम्मेदवार दयेकूगु खः ।
नूग:या ल्वय्, चिनीया ल्वय्चं पीडित सिंह दनेतकं मफुगु खः । पाकिन्सस ल्वय्या समस्या दुम्ह सिंहं मनूतकं बांलाक्क म्हमस्यूगु जानकारी वयेकया छेँजःलं ब्यूगु दु । नेपा:या गणतन्त्र पलिस्थाया निंतिं आजीवन संघर्ष यानाः झायादीम्ह सिंहयात २०४२ सालय् दरबारमार्गय् बम विस्फोट याकेगुलिइ ल्हाः दुगु द्धपनय् पञ्चायती सरकारं फाँसीया सजाय न्यंकूगु खः । वय्कः ताःहाकःगु ईतक भारतय् हे च्वनाः २०४६ सालया जनआन्दोलनलिपा जक नेपाः लिहां झायादीगु खः ।
