राष्ट्रिय सरकारया विकल्प मदु : यादव
मधेशी जनअधिकार फोरमया नायः उपेन्द्र यादवं राष्ट्रिय सरकारया विकल्प मदुगु धयादीगु दु ।
बुधवा: निसें वीरगन्जय् न्ह्याःगु फोरमया जिल्ला व भ्रातृ संगठनतय्गु मंकाः अन्तरक्रियाय् ब्वति काय् धुंका: बिहीवा: सञ्चारक:मित लिसे खँल्हाबंल्हा यानादिसें नायः यादवं थज्याःगु खँ धयादीगु खः । वय्कलं राष्ट्रिय सरकार गठनया निंतिं सहमति जुइधुंकाः जक सरकारया नेतृत्व सुनां याइ धइगु विषय क्वःछुइमाःगु धयादीगु दु ।
नेपाःया सीमा भारतीय पक्षपाखें अतिक्रमण यानाच्वंगु विषयस कुटनीतिक माध्यमपाखें समस्याया समाधान मालेमाःगु वय्कलं धयादीगु दु । जिल्ला व भ्रातृ संगठनया नायःतय्त पार्टी अनुशासन संगठन सुदृढीकरण प्रशिक्षण व भाबी संघर्षया निंतिं तयार यायेगु निंतिं अन्तरक्रिया ग्वसाः ग्वःया:गु खँ नायः यादवं धयादीगु दु ।
ज्याझ्वलय् उगु पार्टीया तराईया झिंखुगू जिल्लाय् दुगु जिल्ला नायः व भ्रातृ संगठनया नायःतय्गु ब्वति दुगु खः ।
