राष्ट्रपतिय शासन लागू यायेगु षड्यन्त्र : वैद्य
एकीकृत नेकपा (माओवादी)या वरिष्ठ नेता मोहन वैद्य 'किरणं' माओवादी व एमाले दथुइ ल्वापु जुइमाः धकाः तायेकूपिंसं माओवादीयात निरीह दयेकाः संकटकाल घोषणा यानाः राष्ट्रपतिय शासन लागू यायेगु षड्यन्त्र यानाच्वंगु खँ धयादीगु दु ।
बिहीवा: छगू ज्याझ्वलय् न्ववायेगु झ्वलय् वय्कलं संकटकाल घोषण यानाः राष्ट्रपतिय शासन लागू यायेत एमालेया ओली गुट जिम्मेवार जुइगु नं धयादीगु दु । नेता वैद्यं विदेशी शक्तिया तुतां चुयाः दयेकूगु आःया सरकारं देय् व जनताया पक्षय् ज्या यायेमफइगु जूगुलिं नैतिकताया आधारय् याकनं सरकार त्वःतेमाःगु धयादीगु दु । थःत लोकतन्त्रया मतियार तायेकूपिंसं हे लोकतन्त्रयात स्यायेत्यंगु धयादिसें नेता वैद्यं मंकाः सरकार गठनया निंतिं एमाले दुनेया देश्भक्त व कांग्रेस दुनेया लोकतान्त्रिक शक्तिलिसे याकनं हे सहलह न्ह्यःने न्हयाकेगु धयादिल ।
वयेकलं देशय् खनेदुगु जटिल परिस्थितिलिसे ल्वायेत सतक संघर्षय् वनेगु धयादिसें आः च्वनीगु केन्द्रीय समितिया बैठकं सतक संघर्षया प्याकेज घोषणा यायेगु धयादीगु दु । सेना समायोजन विशेष समितिया नायःसं प्रचण्ड हे जुइमाःगु वय्कःया धापू दु ।
ज्याझ्वलय् न्वंवानादिसें काँग्रेस नेता डा. रामशरण महतं संसद न्ह्याके माओवादीं मब्यूसा अध्यादेशपाखें बजेट हइगु धयादिल । वय्कलं माओवादी नेतृत्वया राष्ट्रिय सरकार कांग्रेसं म्हगसय् तकं म्हंकेमफइगु धयादिसें वर्तमान एमाले नेतृत्वया सरकारयात हे राष्ट्रिय सहमतिया सरकारया स्वरुप बिइ धाःसा फइगु धयादीगु दु । निगू सेना समायोजन जुइ धकाः गनं न्ह्यथना मतःगु धयादिसें नेता महतं माओवादी जनसेना सेनाय् समायोजन जुइ धइगु छु नं ग्यारेन्टी मदुगु धयादिल ।
