ईलय् हे संविधान निर्माण जुइ : कोइराला
पुलांम्ह प्रधानमन्त्री व नेपाली कांग्रेसया सभापति गिरिजाप्रसाद कोइरालां निर्धारित ईलय् हे संविधान निर्माण यायेगु ज्या क्वचाइगु खँ धयादीगु दु ।
बिहीवाः थःगु गृह जिल्ला विराटनगरय् कांग्रेस कार्यकतानाप खँल्हाबंला यानादिसें कोइरालां ईलय् हे संविधान निर्माण जुइगुलिं थुकी संका मयायेत कार्यकतातय्त इनाप यानादिल । वयेकलं छिमेकी देय्तय्सतं नं ईलय् हे संविधान निर्माण जुइमाःगु खँ धयाच्वंगु धासें निर्धारित ई दुने हे संविधान निर्माण यायेगु ज्या क्वचाइगु विश्वस प्वंकादिल ।
सभापति कोइरालां फुक्क दलत छधी जुयाः राष्ट्रिय सरकार दयेकेधुंकाः संविधान दयेकेगु धयादिसें दलतय्त सत्ता समीकरणय् स्वयां नं संविधान दयेकेगुयात महत्वपूर्ण तायेकाः न्ह्यःने न्ह्यायेत इनाप यानादीगु दु ।
अथेहे वयेकलं नेपालय् छुं पुचःलं विदेशी हस्तक्षेप जूगु धकाः हल्ला यानाच्वंगु धासें नेपालय् छुं नं कथंया विदेशी हस्तक्षेप मजूगु दाबी यानादिल ।
