नेवाः भासं नं अनुवादया सुविधा
येँ / (सन्ध्या टाइम्स) संविधान निर्माणया ज्याय् ग्वाहालि जुइमा धकाः युएनडीपीपाखें साचालन जुयाच्वंगु संवैधानिक संवाद केन्द्रं आवंलि थःपिंसं याइगु छुं नं ज्याझ्वःयात नेवाः भासं नं अनया अन हे भाषानुवाद यानाः न्ह्यब्वयेगु ज्या न्ह्याकूगु दु ।
माचय् दनाः न्ववानाच्वंम्ह वक्तां अंग्रेजीं संवोधन यानाच्वंसां न्यनीम्ह श्रोतां उकियात नेवाः भासं न्यने फइगु व्यवस्था अन याःगु खः । न्हापा थ्व सुविधा खय् भाय्या लागिं जक दुगु खःसा आः मैथिली व नेपालभाषाय् नं विस्तार याःगु खः । थुकिया निंतिं अन उपस्थित जुइम्ह श्रोतां नेवाः भासं अनुवाद वयाच्वंगु एअरफोन न्हाय्पनय् तयाः न्यनेमाली ।
म्हीग संसद दिवसया लसताय् संवाद केन्द्रं थःपिनि थप सेवा विस्तारया उलेज्या समारोहयात उकथं स्वंगू भासं अनुवाद यानाः न्यंकेगु ज्या याःगु खः ।
वर्तमान संविधानसभा दुने नं थज्याःगु हे प्रविधिपाखें थीथी भासं न्ववायेगु व न्यनेगु व्यवस्था जुइमाः धकाः माग जुयाच्वंगु खः ।
