विकास बैंकया स्वम्हेसित जरिवाना, शुक्रवाः तकया दुने बैंक खारेजया निवेदन
येँ / (सन्ध्या टाइम्स) नेपाल राष्ट्र बैंकं नेपाल विकास बैंकया अध्यक्ष लगायत निम्ह संचालकयात नगद जरिवाना याःगु दु । राष्ट्र बैंकं उमित मखुगु विवरण पेश याःगु द्वपनय् उकथं जरिवाना याःगु खः ।
केन्द्रीय बैंकं उमित राष्ट्र बैंकय् झुठा विवरण पेश याःगु धासें राष्ट्र बैंकया ऐन १०० कथं जरिवानाया निंतिं पौ छ्वयागु खँ कन्द्रीय बैंक स्रोतं धाःगु दु ।
राष्ट्र बैंक ऐनया उगु दफा कथं गुगुं नं बैंक वा वित्तीय संस्थाया संचालकत मेगु बैंक वा वित्तीय संस्थाय् प्रत्यक्ष रुपं संलग्न जूगु दसि प्रमाण दत धाःसा उकियात कयाः कारवाही यायेगु प्रावधान दु ।
थुगु कारवाही प्रकि्रया अन्तर्गत विकास बैंकया अध्यक्ष अमर गुरुङयात निगू लाख व निम्हं संचालकयात म्हति छगू छगू लाख जरिवाना यायेगु निर्णय याःगु दु ।
राष्ट्र बैंकं याःगु थुगु कारवाही प्रक्रियाय् लाःपिं अध्यक्ष गुरुङ व निम्हं संचालकत नेपाल सहकारी लिमिटेडय् नं अध्यक्ष व संचालक जुयाच्वंपिं खःसा उगु सहकारीइ नेपाल विकास बैंकया गुंगू अर्ब दां निक्षेप जुयाच्वंगु नं राष्ट्र बैंक स्रोतं धाःगु दु ।
विकास बैंक खारेज यायेगु निर्णयय् यायेधुंकूगु राष्ट्र बैंकं खारेजया निंतिं शुक्रवाः तकया दुने अदालतय् निवेदन दर्ता यायेफुगु खँ सीदुगु दु ।
