काठमाडौं मेडिकल कलेजपाखें ख्वपय् स्वास्थ्य शिविर
ख्वप / (सन्ध्या टाइम्स) काठमाडौं मेडिकल कलेज सामुदायिक अस्पतालया ग्वसालय् ख्वपया दुवाकोटय् निःशुल्क मिसा ल्वय् सम्बन्धी स्वास्थ्य शिविर जुल । दुवाकोटया काठमाडौं मेडिकल कलेजय् जूगु उगु शिविरय् नेपाल रेडक्रम सोसाइटी दुवाकोट व लायन्स क्लव अफ काठमाडौं उमंगपाखें ग्वाहालि याःगु खः । मंगलवाः न्हिछि जूगु ज्याझ्वलय् च्यासःम्ह मिस्तय्सं थःगु स्वास्थ्य परीक्षण याकूगु खः । पाठेघर क्यान्सर व मचा छेँ कुहाँ वइगु समस्यायात केन्द्रीत यानाः याःगु उगु शिविरय् 'र्याप स्मेयर' नं याःगु खँ ग्वसाः खलकं धाःगु दु ।
शिविरय् स्त्री रोग विशेषज्ञिपं डा. उर्मिला कार्की, डा. विनिता प्रधान, डा. रीना श्रेष्ठ, डा. प्रेरणा वंशल, डा. अम्विका वैद्यिपंस स्वास्थ्य परीक्षण याःगु खः । गामय् च्वंपि मिस्तय्त अप्वः मचाछेँ कुहाँ वइगु समस्या अप्वयाच्वगुलि उगु शिविर चले यानागु खँ नेपाल रेडक्रस सोसाइटी दुवाकोट उपशाखाया सभापति शिवहरि केसीं कनादिल । शिविरय् सितिकं वासः नं याःगु खः ।
