'मस्तय्त शारीरिक सजायँ बी मजिउ'
थिमि / (सन्ध्या टाइम्स) विद्यार्थीतय्सं थःगु छेँज्या मयासां हे नं शिक्षकतय्सं उमित शारीरिक सजायँ बी मजिउगु खँ स्वयम् शिक्षकतय्सं धाःगु दु । सिवर्ड इन्टरनेशनल उच्च मावि मध्यपुर थिमिया ग्वसालय् जूगु 'शिक्षाया महत्व सृजनशीलता व लेखनकला' विषयया कार्यशाला गोष्ठीइ ब्वति काःपिं शिक्षकतय्स उगु सुझाव बिउगु खः ।
ख्वप जिल्लाय् मावि तहलय् ब्वंकाच्विपं शिक्षकतय्सं विद्यार्थीतय्सं छेँय् यायेमाःगु स्कूलया ज्या याये मफुसां उमित सजायँ बीगु मयासे उमित उत्प्रेरित यायेगु सल्लाह बीगु व शिक्षा नापं ज्ञानया महत्व बारे कनेगु ज्या यायेमाःगु बिचाः प्वंकूगु खः । उगु गोष्ठीइ शिक्षाविद् वामदेव योगी व मनोवैज्ञानिक डा. तीर्थराज लुँइटेल ज्यापौ न्ह्यब्वयादीगु खः । ज्यापौयात कयाः कलेजया प्राचार्य सुरेन्द्रविक्रम प्रजापति कलेज व्यवस्थापन समितिया अध्यक्ष शिवकृष्ण श्रेष्ठ, कार्यकारी अधिकृत ज्ञानराम श्रेष्ठ व अध्यापक प्रेमप्रसाद निरौलापिंसं न्ववानादीगु खः ।
