बन्द हडताल निधेष यायेगु प्रस्ताव

नेपाली कांग्रेस एमाले व फोरमया छकू कुचा जानाः दयेकूगु वर्तमान सरकारं आः देशय् अनावश्यक रुपं आन्देालन याये मदइगु प्रस्ताव हयेत्यंगु समाचार पिहां वःगु दु । बन्द हडताल चक्काजाम आदि थेंज्याःगु ज्याझ्वलं वाक्क जुयाच्वंपिं नेपाःमि जनताया लागिं थ्व छगू सुखद समाचार जुइफु । थज्याःगु प्रस्तावयात जनतां लसकुस याइगु निश्चित दु ।

तर राजनीतिक पार्टीतय्गु बेइमानी स्वयादिसँ उकुन्हु माओवादी सरकारय् दुगु इलय् माओवादीपाखें हे थज्याःगु छगू प्रस्ताव हःगु खः । उकियात एमाले व कांग्रेसं अस्वीकार यात । कांग्रेसं न्हापा नं छगू प्रतिवद्धता हे पिकयाः थःगु पार्टीं बन्द हडताल थेंज्याःगु ज्याझ्वः गबलें याये मखु धकाः बचं बिउगु खः । तर माओवादी सरकारय् वयेधुंकाः न्हापांगु स्वनिगः बन्द कांग्रेसया हे भातृ संगठन नेवि संघं यात । आः वहे कांग्रेस व एमाले सरकारय् दु आः उमिसं हे बन्द हडताल याये मदइगु प्रस्ताव हयेगु धयाच्वंगु दु । सरकारं हइगु थ्व प्रस्तावयात आः माओवादीं अस्वीकार याइगु खः लाकि धइगु ग्याःचिकु दु व छुं जुयाः माओवादीं अस्वीकार यात धाःसा उकी अजूचायेमाःगु नं आवश्यकता मदु ।

खतुं थःत चित्त बुझे मजूगु खँय् आन्दोलन यायेगु जनताया नैसर्गिक अधिकार खः । तर नेपालय् आन्दोलन यायेगु थ्व अधिकारया प्रशस्त दुरुपयोग जुयाच्वंगु दु । उकिं थुकियात निषेधित हे यायेगु सिबें गनं कि गनं व्यवस्थित यायेमाःगु धाःसा अतिकं आवश्यक दु । सरकार विपक्षी व मेमेगु नं राजनीतिक पार्टीत जानाः थुकिया लागिं पहल जूसा नेपाली जनतां देशय् लोकतन्त्र वःगुया छुं भचा सार नं खंकीगु खः ला ?

More Stories Like this