खुलाःया दुने कमैया पुर्नस्थापना

सरकारी संचारमाध्यमय् नं नियुक्ति

मन्त्रिपरिषदया बैठकं खुलाःया दुने मुक्त कमैया पुर्नस्थापना यायेगु निर्णय याःगु दु ।

बुधवाः च्वंगु बैठकं कमैया पुर्नस्थापना याये ल्यंदनीगु जिल्लाय् खुलाःया दुने ज्या क्वचायेकीगु निर्णय याःगु दु । अथेहे येँया फोहोर व्यवस्थापन यायेगु निंतिं नुवाकोटया बन्चरे डाँडाय् फोहोर ल्याण्ड फिल्ड साइड त्ययेगु निर्णय नं याःगु दु ।

सरकारया प्रवक्ता व सुचना व संचारमन्त्री शंकर पोखरेलया कथं सरकारं नेपाल टेलिभिजनया अध्यक्षय् कुन्दन अर्याल, चलचित्र विकास बोर्डय् अमर गिरी, गोरखापत्र संस्थानया अध्यक्षय् विजय चालिसे व महाप्रवन्धकय् शंभु श्रेष्ठ, राससलय् बालकृष्ण चापागाई व गुठी संस्थानय् नारायणप्रसाद आचार्ययात नियुक्त याःगु दु ।

मन्त्रिपरिषदया मेगू बैठक सोमवाः च्वनीगु जूगु दु ।