शक्ति आर्जन यायेत चितवनय् : प्रचण्ड
येँ / (सन्ध्या टाइम्स) राष्ट्रिय सरकार गठन यायेगु शक्ति आर्जन यायेत थः चितवन वयागु खँ माओवादी अध्यक्ष पुष्पकमल दाहाल 'प्रचण्डं' धयादीगु दु । थौं सुथय् चितवनय् पत्रकारतलिसे खँ ल्हासें वय्कलं उगु खँ धयादीगु खः । वय्कलं संविधान दयेकेगु व जनमतया कदर यायेत माओवादी सरकारआवश्यकता दु धासॆं याकनं हे माओवादीया नेतृत्वय् राष्ट्रिय सरकार गठन जुइगु खँ नं कनादिल ।
देशी विदेशी शक्तित मिले जुयाः नेपाःया अस्तित्व तंकेत स्वयाच्वंगु द्वपं बियादिसें वय्कलं विखण्डनकारी शक्तियात परास्त यायेत थम्हं अभियान न्ह्याकागु खँ धयादीगु दु । वय्कलं धयादिल 'थ्व सरकार विदेशी कतांमरि सरकार खः ।'
माओवादी अध्यक्ष प्रचण्ड थौं चितवनय् थः ब्वनागु स्कूल निरीक्षण यायेत झाइगु ज्याझ्वः दु । वय्कःया छेँजःपिं कास्कीं बसाई सराई जुइ धुंकाः चितवनय् च्वं वःगु खःसा प्रचण्डं अनया हे शिवनगर माविइ थःगु स्कूल जीवन फुकादीगु खः ।
