रामराजाप्रसाद अस्पताल भर्ना
येँ / (सन्ध्या टाइम्स) गणतन्त्रवादी नेता रामराजा प्रसाद सिंह म्हं मफयाः म्हिगः नर्भिक अस्पतालय् भर्ना जुयादीगु दु ।
वय्कःयात म्ह स्याइगु होश मदइगु म्हय् चिया मात्रा कम जुइगु समस्या जुयाच्वंगु खँ चिकित्सकतय्सं धाःगु दु । सिंहयात इलय् ब्यलय् होस मदइगु जुयाच्वंगु खँ वय्कःया काय मनोजकुमार सिंहं कनादीगु दु । चिकित्सकतय् कथं सिंहया अवस्था सुधार जुया वनाच्वंगु दु । सिंहयात नर्भिक अस्पतालया सीसीयु २०५ नम्बर क्वथाय् तयाः वासः याकातःगु दु ।
सिंहं गणतान्त्रिक नेपाःया न्हापांम्ह राष्ट्रपतिया रुपय् माओवादीपाखें उम्मेदवारी बियादीगु खः ।
आन्दोलन याये मदइगु प्रस्ताव
येँ / (सन्ध्या टाइम्स) नेपाल सरकारया मन्त्रिपरिषद बैठक थौं च्वनेत्यंगु दु । थौंया मन्त्रिपरिषद बैठकय् गृह मन्त्रालयं छगू विशेष प्रस्ताव प्रस्तुत यायेत्यंगु खँ सूत्रं धाःगु दु । सूत्रया कथं विशेष प्रस्ताव पारित जुल धाःसा देय्न्यंकं बन्द हडताल व जुलुस याये दइ मखु । देशय् ब्वलना वनाच्वंगु अराजक गतिविधियात नियन्त्रण यायेत सरकारं थ्व प्रस्ताव हयेत्यंगु खँ सूत्रं धाःगु दु ।
