सतकय् लाश तयाः प्रदर्शन
येँ / (सन्ध्या टाइम्स) दांगय् म्हिगः गाडीया ठक्करं मनू सीवं थौं स्थानीय जनतां प्रदर्शन याःगु दु । मृत्युया विरोधय् यातायात व्यवसायीत लिसे वार्ता यायेमाःगु माग यासें अन प्रदर्शन जूगु खः । बन्दं यानाः यातायात बजाः पसः उगु लँपु जुयाः चले जुइगु यातायात नं फुक्कं ठप्प जुयाच्वंगु दु ।
प्रदर्शनया झ्वलय् स्थानीय जनतां दुर्घटनाय् लानाः सीम्ह मनूया लाश हे सतकय् तयाः ब्वयातःगु दु । थौं सुथंनिसें पिहां वःगु जुलुसं अनया बसपार्कय् दिकातःगु यातायात नं तोडफोड याना बिउगु खः ।
स्थानीय वासिन्दाया प्रदर्शनया कारणं अनया स्थिति तनावपूर्ण जुयाच्वंगु दु ।
स्थानीय जनतां पसः तिकेगु सवारी साधन तोडफोड यायेगु ज्या यानाच्वंसां नं प्रहरी धाःसा मूकदर्शक जुयाच्वंगु खँ धाःगु दु ।
जुलुसया न्ह्यः न्ह्यः वनाच्वंपिं प्रहरीं तकं नं चालाच्वंगु पसः तिकेत दवाव बियाच्वंगु खँ धाःगु दु ।
प्रहरीतय्सं 'पसः तिउ जिमिसं सुरक्षा बी मफु' धकाः धायेगु यानाच्वंगु खँ जिमि संवाददातां धाःगु दु ।
स्थानीय वासिन्दाया प्रदर्शनया कारणं दांग घोराही व दांग लमही सतकखण्ड नं पूर्ण रुपं अवरुद्ध जुयाच्वंगु दु ।
