वजेट सार्वजनिक जुइ मफुगुया कारण अवरुद्ध संसद
येँ / (सन्ध्या टाइम्स) राष्ट्रपति डा. रामवरण यादवयात नाप लानाः संविधान सभाया सभाध्यक्ष सुभाषचन्द्र नेम्वाङं संसद बांलाक न्ह्याये मफयाच्वंगुलिं हे थुगु आर्थिक दँया वजेट इलय् हे सार्वजनिक याये मफुगु खँ स्पष्ट यानादीगु दु ।
लिसें सभाध्यक्ष नेम्वाङं असारया प्यंगूगु वाःपाखे वजेट हयाः लिपांगु वालय् पेश्की खर्च विधेयक पास याये मफत धाःसा स्थिति झन जटिल जुइगु व देय्या अर्थतन्त्र नं ठप्प जुइफुगु धासें चिन्ता प्वंकादिल ।
व्यवस्थापिका संसदया कार्य संचालन नियमावली पेश याये झिंन्यान्हु न्ह्यः विनियोजन विधेयक सिद्धान्त व प्राथमिकताया बारे सहलह क्वचायेके माःगु प्रावधान दु । तर थुगु आर्थिक दँ क्वचायेत झिंन्यान्हु जक ल्यं दतं नं संसद बांलाक न्ह्याये मफयाच्वंगु धाःसा मदुनि । थुकिया कारणं वय्कलं सभामुखया हैसियतं वर्तमान संसद तकं अन्त्य याये फयाच्वंगु मदु ।
उगु इलय् सभाध्यक्ष नेम्वाङं सरकारया वार्षिक कार्यक्रमया रुपय् नीति तथा कार्यक्रम राष्ट्रपतिपाखें संसदया बैठकय् न्ह्यब्वयेगु परम्परा दुगु नं जानकारी बियादीगु खः ।
पेश्की खर्च विधेयक पास मयायेकं राज्यया धुकूपाखें छतका दां नं खर्च यायेगु व कर म्हये मदुगु खँ अन्तरिम संविधानय् न्ह्यथनातःगु दु ।
