अपहरित व्यापारी रिहा यायेगु माग यासे उद्योग बन्द
येँ / (सन्ध्या टाइम्स) नेपालगंजया अपहरित व्यापारी गौरबकृष्ण रस्तोगीयात त्वःतेगु माग यासे म्हिगः निसें नेपालगंज उद्योग वाणिज्य महासंघ उगु लागाया दक्वं उद्योगत अनिश्चितकालया निंतिं बन्दया घोषणा याःगु दु ।
लिसें व्यापारीतय् छगू पुचलं उद्यमेगी व्यवसायीतय् सुरक्षाया माग यासे जिल्ला प्रशासन कार्यालय् बाँकेय् छगू ज्ञापन पौ नं लःलहाःगु दु ।
व्यापारी रस्तोगीयात वंगु झिन्हु न्ह्यः नेपालगंजया डि्रमल्याण्ड होटलं अपहरण याना यंकूगु खः । रस्तोगी नेपालगंजया हे त्रिभुवनचोक व भारतया रुपैडियाय् व्यवसाय याना वयाच्वंम्ह खः ।
अपहरणकारीतय्सं मुक्त यायेत फिरौटी वापत न्हय्गू लाख दां कायेधुंकाः नं रस्तोगीयात अपहरण मुक्त मयाःगु खँ वया छेँजःपिंसं धाःगु दु ।
