मांभासं शिक्षा बीगुया महत्व
थुगुसीया एसएलसी परिक्षाय् नेवाः भाय्या माध्यमं आखः ब्वंकीगु न्हापांगु स्कूल जगत सुन्दर ब्वनेकुथिपाखें न्हापांखुसी जाँच बिउपिं शतप्रतिशत विद्यार्थीतय्सं बांलाःगु ल्याः हःगु समाचार पिहां वःगु दु । झिंस्वम्ह मस्तय्सं जाँच बिउगुली खुम्ह विशिष्ट श्रेणीइ पास जूगु दुसा मेपिंसं न्हापांगु श्रेणीया ल्याः हःगु दु । जगत सुन्दर ब्वनेकुथिं चूलाकूगु थ्व सफलताया लागिं पास जूपिं सकलें विद्यार्थी नापं अनया शिक्षक शिक्षिका व व्यवस्थापन पक्षयात बधाई बीमाः ।
जगत सुन्दर ब्वनेकुथि मात्र छगू स्कूलया नां मखु । थ्व मांभासं शिक्षा बीगु जनजाति आन्दोलनया हे छगू बिस्कं अभियानया नां खः । नारा जक थ्वयेकेगु मखु ज्या हे यानाः क्यनेमाः धइगु भावना दुपिं भाषा आन्दोलनया छथ्वः न्ह्यलुवातय्सं थ्व ब्वनेकुथि चायेकूगु खः । शुरुया छुं ई थाकुक न्ह्याःगु खःसां आः थ्व ब्वनेकुथि थःगु हे तुतिं चुयाः सललं न्ह्यानाच्वंगु दु । आः एसएलसीइ न्हापांखुसी हे थ्व स्कूलं चूलाकूगु सफलतां जगत सुन्दर ब्वनेकुथियात जक सफल याःगु मखु बरु मांभासं आखः ब्वंकाः नं झी मस्त तथाकथित शिक्षाया मूलधारं पिने मलाः व उकी नं उमिसं बांलाःगु थाय् कायेफु धइगु खँयात प्रमाणित याना बिउगु दु । मातृभाषां शिक्षा बीमाः धइगु सकल जनजातिया आन्दोलनयात थ्व सफलतां अझ उर्जा थपे याना बिउगु दु । मातृभाषां शिक्षा बीगुया अर्थ मदु धयाच्वंपिंत थुकिं छगू बांलाःगु लिसः बिउगु दु । वास्तवय् मांभासं आखः ब्वंकूसा हे जक झी मस्त नं शिक्षाय् न्ह्यःने लाइ धइगु खँया थ्व छगू जीवन्त दसु खः । सकलें नेवाः व गैर नेवाःतय्त थुकिं मिखा चायेका बीगु भलसा झीसं कायेछिं ।
More Stories Like this
छाय् जुइ थपाय्जिगु अपराध? जनतायात सास्ती जुइगु विरोध मजिल उपप्रमपाखें भारतय् याःवंगु ब्रिफिंग अपराध व राजनीति आः नापनापं हे माओवादी सहमतिया थीथी पक्ष
