बूपिंसं नेतृत्व याःगु सरकारय् माओवादी वनीमखु : प्रचण्ड
एकीकृत नेकपा (माओवादी)या अध्यक्ष पुष्पकमल दाहाल 'प्रचण्डं' माओवादी बूपिसं नेतृत्व याःगु सरकारय् छुं नं हालतय् मवनीगु खँ धयादीगु दु । वयेकलं थ्व सरकार विदेशीतय् इसाराय् निगरिक सर्वोच्चतायात हालांकयाः गठन जूगुलिं सरकारय् ब्वति काये मफइगु धयादिल । वयेकलं माओवादी नं थ्व सरकारय् ब्वति काई धकाः हल्ला यानाः कांग्रेस-एमाले गठबन्धनं थ्व सरकारया आयु अप्वेकेत स्वयाच्वंगु धयादिल, - 'माओवादी थ्व सरकारय् ब्वति काई धइगु उमिगु म्हगस पूवनीमखु ।'
झिंन्यादँ लिपाः थःगु गां चितवनया शिवनगरय् थ्यंकादिम्ह अध्यक्ष प्रचण्ड थः छेँजः व सर्वसाधारणत नापलायेधुंकाः संचारकर्मीत नाप खँल्हाबंला यानादिसें याकनं हे माओवादी नेतृत्वया सरकार गठन जुइगु धयादिल । वयेकलं जनताया संविधान निर्माणया निंतिं व जनमतया कदर यायेगु निंतिं नं माओवादी नेतृत्वय् सरकार गठन जुइमाःगु दाबी यानादिल ।
कला सीता व काय् प्रकास सहित अन थ्यंकादिम्ह प्रचण्डं वि.सं. २०२६सालय् शिवनगर गांया हे नारायणी विद्यामन्दि विद्यालयं एसएलसी पास यानादीगु खः ।
