स्वाइनफ्लु लुइवं देय्न्यंकं हे सतर्कता
येँ / (सन्ध्या टाइम्स) देशय् स्वाइन फ्लुया विरामी लुइवं सरकारं देय्न्यंकं हे सतर्कता नालेगु ज्या न्ह्याकूगु दु । भारत व चीनया सीमा नाकाय् दुहां वईपं प्रत्येक मनूया स्वास्थ्य परिक्षण यायेगु लािगं अन हेल्थ डेस्क चायेकूगु दुसा गनं नं स्वाइन फ्लुया जानकारी वयेसातकि तुरुन्त ब्वाँय् वनीगु चिकित्सकतय् टिम नं तयार याःगु दु । लिसें फुक्क हे अस्पतालय् स्वाइन फ्लुया वासः नं स्टाय्ण्ड बाइ हे तया तयेगु कथं छ्वया बिउगु दु । स्वाइन फ्लु पत्ता लगे जुल धाःपिं स्वम्हं मनूयात आः उमिगु हे छेँय् तयाः विशेष स्वास्थ्य पुचलं वासः यानाच्वंगु दु ।
दिगुख्यः गुथिपाखें लिपि कक्षा काइगु
येँ / (सन्ध्या टाइम्स) तुलाधर समुदायया दिगुख्यः गुथिया ग्वसालय् निवाःयंक नेपाल लिपि कक्षा न्ह्याकेत्यंगु दु । थ्वहे वइगु २३ असार गतेनिसें न्ह्याइगु उगु लिपि कक्षाय् गुथिया दुजःतय्त निःशुल्क लिपि स्यनेगु खँ गुथिं धाःगु दु । लिपि कक्षा नेपाल लिपि गुथि साःननीपाखें काइगु खँ नं धाःगु दु ।
