अपहरणया द्वपनय् किपू बन्द
येँ / (सन्ध्या टाइम्स) मनू अपहरण याःगु द्वपं बिसें थौं किपूया भत्क्यापाटीइ च्वंिपं स्थानीय जनतां किपू बन्द याना बिल ।
उमिसं सुजीव केसीयात अपहरणया कुतः याःगु धासें थ्व बन्द याःगु खः ।
तर उखे प्रहरीं बिउगु जानकारी कथं निगू पक्ष दथुइ जूगु ल्वापु लिपा छगू पक्षं अपहरणया द्वपं बिउगु खः । प्रहरीं ज्वनातःम्ह जुलुमकाजी महर्जनं प्रहरीयात धाः कथं निगू पक्षया दथुइ म्हिगः ल्वापु जूगु व वहे घटनायात अपहरण याःगु धकाः द्वपं बिउगु खः ।
घटना विवरण कथं म्हिगः पांगाया छपुचः ल्याय्म्हत चम्पादेवी लागा चाःहिलेत वनाच्वंगु खःसा वहे इलय् भत्क्यापाटीइ च्वनाच्वंपिं ल्याय्म्हत व पांगाया ल्याय्म्हतय् दथुइ ल्वापु जुल । उगु ल्वापुया इलय् भत्क्यापाटीइ च्वंपिंसं पांगाया ल्याय्म्हतय्त दाया हःगु ख । लिपा पांगाया ल्याय्म्हतय्सं हानं थप मनू ज्वनाः भत्क्यापाटीइ ल्वाः वन । उगु ल्वापुइ पांगाया ल्याय्म्हतय्सं छम्ह मनूयात साला हःगु जुयाच्वन । लिपा वयात भत्क्यापाटीइ तुं त्वःता थकल । तर भत्क्यापाटीया मनूतय्सं उम्ह मनूयात अपहरण याना यंकल धइगु द्वपं बिसें थौं किपू बन्द याःगु खः । बन्दं यानाः थौं किपूया बजाः पसः व यातायात ठप्प जुयाच्वंगु दु ।
