थुगुसीया एसएलसी व नेपाःया शिक्षा

थुगुसी पिहां वःगु एसएलसी जाँचया लिच्वलं अप्वःसित लय्तायेका बिउगु दु । नेपाःया इतिहासय् हे दकलय् अप्वः विद्यार्थी पास जूगु थ्व लिच्वलं नेपाःया शिक्षा ख्यःयात नं न्ह्यःने यंकी धकाः पत्याः यायेगु प्रशस्त थाय् दु । छक्वलं ६८.४७ प्रतिशत विद्यार्थी पास जूगु थ्व एसएलसी नेपाःया शिक्षा ख्यलय् छगू न्हूगु गति खः धाःसां जिउ ।

नेपालय् आपालं न्हून्हूगु शैलीं ब्वंकीगु न्हून्हूगु शैक्षिक संस्थानत चायेका हःगु दु । आखः ब्वनीपिं विद्यार्थीतय्के थौंकन्हय् न्हापा थें पास जक जुइ धइगु भावना मदु । आःया विद्यार्थीतय्सं मुक्कं डिस्टिंक्सन हयेगु ताः तयाः ब्वनेगु ज्या याइ । थुकिं यानाः शिक्षा व विद्यार्थी निगुलिंया गुणस्तर थहां वनाच्वंगु दु । तर गुणस्तर च्वन्ह्याःगु शिक्षा धाःसा शहर बजाःया छम्हू वैभवशाली मनूतय् मस्तय्त जक उपलब्ध जुयाच्वंगु दु । गुकिं यानाः देशय् गुणस्तरयुक्त शिक्षा व गुणस्तरहिन शिक्षा यानाः निगू कथंया शिक्षा काईपं मनूतय् निगू हे वर्ग जन्म जुयाच्वंगु दु । थुकी बांलाःगु ल्याः हयाः पास जुईपं विद्यार्थीत नं गांयापिं स्वयां शहरबजाःयापिं जक जुयाच्वंगु दु । अले शहर बजाः लागाय् च्वनीपिं विद्यार्थीतय् ताः धइगु अप्वः ल्याः हयाः विदेश वनेगु हे खः । आः पास जूपिं अधिकांश 'टपर' विद्यार्थीतय् लक्ष्य नं विदेश हे जुयाच्वंगु दइ । थुिकं यानाः झीथाय् उत्पादन जूपिं फुक्क बांलाःिपं विद्यार्थीत विदेशयात पोसे यायेत जक ठिक्क जुयाच्वंगु दु । एसएलसी धुंकाःया शिक्षा व करिअरया भविष्य स्पष्ट मजूगु कारणं भविष्यप्रति चिन्ता काईपं विद्यार्थी व अभिभावकतय् 'पोष्ट एसएलसी' लक्ष्य धइगु विदेश हे जुयाच्वनी । थ्व वास्तवय् लसता सिबें नं चिउताःया विषय खः ।

More Stories Like this