नीनिगू दलया बैठक निष्कर्षविहीन
संसदया अवरोध चीकेत प्रमुख प्रतिपक्षी दल एकीकृत नेकपा (माओवादी) सहति संसदय् दुथ्याःगु नीनिगू दलया बैठक बिना निष्कर्ष क्वचाःगु दु ।
सत्ता नेतृत्व यानाच्वंगु नेकपा (एमाले)या आव्हानय् सिंहदरवाय् च्वंगु संसद सचिवालयलय् च्वंगु नीनिगू दलया बैठकय् ब्वति काःगु अधिकाशं नेतातय्सं संसदया हिउँदे अधिवेशन क्वचायेकेत ग्वाहालि यायेत माओवादीयात इनाप याःगु खः । माओवादी बाहेकया दलं माओवादीयात संसदया अवरोध चीकेत ग्वाहालि यायेत इनाप याःगु खः ।
बैठकय् माओवादीं राष्ट्रपतिया पलाः असंवैधानिक जूगु धासें उकीयात भिंकेमाःगु अडान काःगु व मेमेगू दलं राष्ट्रपतिया पलाः संवैधानिक जूगु खँ तःगु जानकारी कांग्रेस महामन्त्री विमलेन्द्र निधिं बियादिल । माओवादी नेता देव गुरुङं माओवादी सरकारं याःगु निर्णयत दक्वं हिकूगु धासें हाकनं न्हापाया हे संस्कार ब्वलंगु धयादिल । वयेकलं थंज्याःगु संस्कार मिभंकूतल्ले सहमति जुइमफइगु धयादिल । अथेहे वेयेकलं संसदय् सहलह यायगु ज्या जुइमासां माओवादी दर्ता याःगु संकल्प प्रसतावयात सहलह मयाकूगुलिं दुःख प्वंकादिल ।
बैठकय् नेतातय्सं छुं नं छगू राजनीतिक पार्टीया स्वार्थया निंतिं संसदय् अवरोध यायेमज्यूगु बरु थुकीया निंतिं मेगू तरिकां राजनीतिक समस्याया समाधान यायेमाःगु बिचाः प्वंकूगु खः । अथेहे नेतातय्सं संसदया गतिरोध चीकेत प्रमुख राजनीतिक दलतय्त जिम्मेवार जुइत इनाप याःगु दु ।
कम्हय् हाकनं प्रमुख स्वंगु दलत एमाले, कांग्रेस व माओवादी संसद सुचारु यायेगु बारे सहलह याइगु जूगु दु ।
