प्रमुख स्वंगु दलया बैठक विना निष्कर्ष क्वचाल

संसद गतिरोध अन्त्य यायेगु निंतिं च्वंगु प्रमुख स्वंगु दलया बैठक विना निष्कर्ष क्वचाःगु दु ।

मंलगवाः एकीकृत नेकपा (माओवादी)या संसदीय च्याकू सिंहदरवारय् च्वंगु सत्तारुढ नेकपा (एमाले), नेपाली कांग्रेस व प्रमुख प्रतिपक्षी दल माओवादी दथुइया बैठकय् दलतय्सं थःथःगु हे अडान मत्वतेवं सहमति जुइ मफूगु खः ।

एमालें बैठकय् सहमतिया निंतिं लचकता क्यंसाः माओवादीं थःगु अडान मत्वःतुगुलिं सहमति जुइ मफूगु खँ प्रधानमन्त्रीया राजनीतिक सल्लाहाकार रघुजी पन्तं बैठक लिपाः जानकारी बियादिल । वयेकलं बैठकय् एमालें लचकता सहित लिखित प्रस्ताव माओवादीयात लःल्हाःगु धयादिल ।

पन्तया कथं माओवादीं अन्तरीक सहलह लिपाः कन्हय् सुथय् उगु लिखित प्रस्ताव बारे प्रतिक्रिया बीगु जूगु दु ।