पावेलं कांग्रेस सभापति कोइराला नाप बिदाई भेट
अमेरिकि राजदुत न्यान्सी जे पावेलं नेपाली कांग्रेसया सभापति गिरिजाप्रसाद कोइरालालिसे बिदाई भेट यानादीगु दु ।
कोइराला निवास महाराजगंजय् जूगु नापलाये ज्याय् पावेलं नेपालया शान्ति प्रकृया व न्ह्यानाच्वंगु संविधान निमार्णया विषयस सभापति कोइरालालिसे सहलह यानादीगु खः । नापं वय्कःपिं दथुइ सरकारयात पूर्णता बीगु व न्ह्यानाच्वंगु व्यवस्थापिका वैठकया अवरोध चायेकेगु विषयस नं खँ जूगु कोइरालाया विदेश मामिला सल्लाहकार सुरेश चालिसें जानकारी बियादीगु दु ।
उगु हे झ्वलय् पावेलं अमेरिकां नेपालया शान्ति प्रकृयाय् व आर्थिक ग्वाहालि न्ह्याकाः च्वनेगु धयादीगु दु । सभापति कोइरालां धाःसा राजदुत अमेरिका लिहां वनेत्यंगु खँय् च्यूताः प्वंकादीगु खः । नापं वय्कलं न्ह्यानाच्वंगु राजनैतिक गतिरोध अन्त्य यायेत सरकार संचालनया उच्चस्तरिय संयन्त्र दयेकेगु व उकिइ माओवादी नायः प्रचण्ड समेत दइगु विश्वास प्वंकादीगु दु । राजदुत पावेलयात अमेरिकां स्वदेश लितः सतेवं वय्कः कन्हय् अमेरिका लिहाँ झायेत्यंगु खः ।
