नागरिक सर्वोच्चता स्थापित मजूतले माओवादी सरकारय् वनीमखु : किरण
एकिकृत नेकपा (माओवादी)या वरिष्ठ नेता मोहन बैद्य किरणं नागरिक सर्वोच्चता स्थापित मजूतले माओवादी सरकारय् मवनेगु धयादीगु दु ।
मंगलवा: जनसञ्चार अभियानं याःगु छगू ज्याझ्वलय् न्वंवानादिसें नेता किरणं राष्ट्रपतिया पलाया विषयस क्वःमछीइकं माओवादी सरकारय् मवनेगु स्पष्ट यानादीगु खः । राष्ट्रपतिया असंवैधानिक पलाबारे प्रधानमन्त्रीं संवोधन मयाःतले सदन अवरुद्ध न्ह्यानाच्वनीगु नं वय्कलं जानकारी बियादीगु दु । राष्ट्रपतिया पलाबारे प्रधानमन्त्रीं याकनं संवोधन यायेमाःगु ख्याच्वः ब्यादिसें धयादिल -'नत्र परिस्थिति पाय्छि ढंगं न्ह्यःने न्ह्याइमखु ।'
वय्कलं थ्व प्रो-इन्डियन सरकार जूगु धासें वर्तमान सरकारयात नेपाली जनतां थःगु सरकारयारुपं ग्रहण यायेमफुगु धयादीगु दु । नेता किरणं केन्द्रीय समितिया बैठकलिपा सरकार विरुद्ध व्यवस्थित सतक संघर्ष यानाः सरकार क्वःथलेगु धयादीगु दु ।
मेगु छगू प्रसंगय् वय्कलं नायः प्रचण्डया दस्तावेजयात पोलिट्व्युरोया बैठकं पारित याःगु मखसें परिमार्जन सहित केन्द्रिय समितीपाखें पारित यायेगु निर्णय याःगु जानकारी बियादीगु दु । वय्कलं केन्द्रिय समितीया बैठकं महाधिवेशनयाबारे नं निर्णय यायेगु धयादीगु दु । वेयकलं पोलिटब्युरो बैठकय् पार्टीयात बहुपदीय संरचनाय् यंकेगु सहलह न्ह्याःसां नं व उलि महत्वपुर्ण मजूगु समेत धयादीगु दु ।
