संसद गतिरोध अन्त्य यायेगु बारे कांग्रेस व एमाले दथुइ सहमित
सत्तारुढ नेकपा (एमाले) व नेपाली कांग्रेस दथुइ संसदीय नियमावलि कथं संसदया गतिरोध अन्त्य यायेगु सहमति जूगु दु ।
मंगलवाः माओवादीया माग बारे गुकथं सम्बोधन यायेगु धकाः सहलह यायेत निगू दलया शीर्ष नेतातय् बैठक कांग्रेस सभापति कोइराला निवास महाराजगंजय् च्वंगु खः । बैठकं समस्या हल संसदीय नियामावलि कथं मालेगु सहमति जूगु खँ उर्जामन्त्री प्रकाशशरण महतं जानकारी बियादिल ।
निगू दलया शीर्ष नेतात व सरकारय् दुथ्याःगु निगूलि दलया मन्त्रीत दुथ्याःगु बैठकं थौं संसदया गतिरोध अन्त्य यायेगु बारे माओवादी नाप खँल्हाबंला यायेगु व लिपा संसदय् दुथ्याःगु नीप्यंगुलि दल नाप सहलह यायेगु खँ क्वछीगु दु ।
संसद सुचारु यायेत एमाले व माओवादी म्हिग च्वंगु बैठकय् एमालें कांग्रेस नापया सहलह लिपाः जक माओवादी नाप सहमति यायेफइगु खँ धाः कथं थौं कांग्रेस नाप सहलह याःगु खः ।
थौंया बैठकय् कांग्रेस सभापति गिरिजाप्रसाद कोइराला, संसदीय दलका उपनेता प्रकाशमान सिंह, महामन्त्री विमलेन्द्र निधि, केन्द्रीय दुज: कृष्णप्रसाद सिटौला व मन्त्रीतय् उपस्थिति दुगु खसा: एमालेया पाखें प्रधानमन्त्री माधवकुमार नेपाल, अध्यक्ष झलनाथ खनाल, महासचिव ईश्वर पोखरेल व मन्त्रीतय्सं ब्वति का:गु ख: ।
