निरन्तर संसद अवरोधया कारण दलत दथुइ असमझदारी : प्रम
प्रधानमन्त्री माधवकुमार नेपालं निरन्तर जुयाच्वंगु संसद अवरोधया कारणं दलत दथुइ असमझदारी अप्वयाच्वंगु खँ धयादीगु दु ।
संसद दिवसया लसताय् संवैधानिक संवाद क्लबं मंगलवाः येँय् याःगु ज्याझ्वलय् न्ववानादिसें प्रधानमन्त्री नेपालं संसद सुचारु यायेत दलत दथुइ याकनं सहमति जुइमाःगु धासें दक्वं समस्या हल संवाद, सहमति व सहकार्य मार्फत यायेमाःगु खँय् बः बियादिल ।
ज्याझ्वलय् सभाध्यक्ष सुवाषचन्द्र नेम्वाङं जनताया सः तयेगु थाय् बन्द जुयाच्वंगुलिं थुकी दक्वं सचेत जुइमाःगु बिचाः प्वंकादिल । वयेकलं संसदया गतिरोध याकनं अन्त्य जुइगु विश्वास प्वंकादिल ।
अथेहे एकीकृत नेकपा (माओवादी)या वरिष्ठ नेता डा. बाबुराम भट्टराईं संसदय् संकल्प प्रस्ताव बारे सहलह याकेमबीया दलतय्सं संसदीय प्रणलीया हे उपहास याःगु धयादिल । वयेकलं संकल्प प्रस्ताव बारे सहलह मयाकूगुलिं हे राजनीतिक गतिरोध उत्पन्न जूगु धयादिल ।
नेपाली कांग्रेसया संसदीय दलया नेता रामचन्द्र पौडेलं संसद सुचारु यायेत प्रधानमन्त्रीं अग्रसरता क्यनेमाः धयादिल ।
