माओवादी-कांग्रेस ल्वापुं प्रम दिक्क
येँ / (सन्ध्या टाइम्स) माओवादी व कांग्रेसया खँ मिले मजुयाः प्रधानमन्त्री माधव नेपाल दिक्क जुयाच्वंगु खँ सीदुगु दु ।
माओवादीं सदन व सतक निगुलिं थासं आन्दोलन यायेवं प्रधानमन्त्री नेपालं माओवादी अध्यक्ष प्रचण्डयात गोदावरी वनाः नापलानाः खँ मिले याःगु खःसा उगु खँयात कयाः कांग्रेसं असहमति प्वंकेवं राजनीतिक गतिरोध अप्वया वनाच्वंगु खः । गोदावरीइ माओवादी अध्यक्ष प्रचण्ड व प्रम नेपाल दथुइ जूगु सहमति कथं प्रमं सदनय् संवोधन यायेगु व उगु संवोधनय् सेनापति प्रकरणय् राष्ट्रपितं ल्ह्वंगु पलाःया बारे खँ न्ह्यथनेगु सहमति जूगु खःसा कांग्रेसं राष्ट्रपतिया पलाःया बारे प्रमया संवोधनय् न्ह्यथने मजिउगु अडान काःगुलिं प्रम नेपालं आः तक माओवादीलिसे याःगु सहमति कथं सदनय् संवोधन तकं याये फयाच्वंगु मदुनि । प्रमया संवोधन बारे माओवादी व कांग्रेस सहमत जूसां नं भाषाया खँय् वयाच्वंगु विवादं थःत दिक्क यानाच्वंगु प्रम नेपालं थः सतीपिंत कनेगु यानाच्वंगु खँ सीदुगु दु ।
