मोतिलक्ष्मीया सछिदँय् चिनाखँ कासा
येँ / (सन्ध्या टाइम्स) नेपालभाषा मिसा खलःया संस्थापक अध्यक्ष व नेपाःया हे न्हापांम्ह मिसा बाखं च्वमि मय्जु मोतिलक्ष्मी उपासिकाया सछिदँ बुन्हि थ्वहे वइगु शनिवाः तःजिक न्यायेकीगु जूगु दु । थ्वहे सछिदँ बुन्हिया झ्वलय् नेपालभाषा मिसा खलकं विद्यालयस्तरया चिनाखँ धेंधेंबल्लाः कासा यात ।
स्वंगू चरण यानाः जूगु उगु कासाय् माध्यमिक पुचलय् परोपकार उमाविया रोशन महर्जन न्हाप लाःगु खःसा निम्न माध्यमिक पुचलय् जगत सुन्दर ब्वनेकुथिया जमुना श्रेष्ठ व प्राथमिक पुचलय् इकेदा इन्टरनेशनलया सचेतना मानन्धर न्हाप लाःगु खः ।
कवयित्री मय्जु नारायणदेवी श्रेष्ठ मू पाहां कथं झाःगु उगु ज्याझ्वः नेपालभाषा मिसा खलःया निकं मंगला कारंजितया सभापतित्वय् जूगु खः । कासाय् खुगू स्कूलया विद्यार्थीतय्सं ब्वति काःगु खः ।
