जगत सुन्दरया खुम्ह विशिष्ट श्रेणी
येँ / (सन्ध्या टाइम्स) थुगुसीया एसएलसी परिक्षाय् नेपालभाषाया माध्यमं आखः ब्वंकीगु न्हापांगु स्कूल जगत सुन्दर ब्वनेकुथिया खुम्ह विद्यार्थी विशिष्ट श्रेणीइ पास जूगु दु ।
जगत सुन्दर ब्वनेकुथि थुगुसी न्हापांखुसी एसएलसी जाँचय् सहभागी जूगु खः । ब्वनेकुथिपाखें थःगु न्हापांगु एसएलसी परिक्षाय् १३ म्ह विद्यार्थीयात सहभागी याःगु खःसा उकी मध्यय् खुम्ह विशिष्ट श्रेणीइ व ल्यं दुपिं न्हय्म्ह न्हापांगु श्रेणीइ पास जूगु दु ।
जगत सुन्दर ब्वनेकुथि नेपालय् हे मांभासं आखः ब्वंकीगु न्हापांगु निजीस्तरं चायेकूगु स्कूल खः । थन न्हापा प्राथमिक तिगं तक जक नेपालभाषाया माध्यमं आखः ब्वंकीगु खःसा लिपा उकियात बढे यानाः निमावि तक यानाः थुगुसीनिसें एसएलसी जाँच बीगु समेत शुरु जूगु खः ।
थःगु स्कूलपाखें न्हापांखुसी हे हासिल याःगु लिच्वःपाखें स्कूलया सकलें शिक्षक शिक्षिकापिं उत्साहित जूगु दु ।
वास्तवय् मांभाय्या माध्यमं शिक्षा हासिल यायेबलय् नं विद्यार्थीतय्सं बांलाःगु लिच्वः हयेफु धइगु खँ थुकिं प्रमाणित याना बिउगु खँ अनया प्रिन्सिपल माया मानन्धरं कनादिल ।
थुगुसीया एसएलसी जाँचय् आः तकया हे दकलय् अप्वः ६८.४७ प्रतिशत पास जूगु खः ।
