मदिक्क वा वयेवं पोखराय् उडान रद्द
येँ / (सन्ध्या टाइम्स) धार्मिक पर्यटक क्षेत्र मुक्तिनाथ यात्राय् वनीपिं यात्रुत अप्व वनाच्वंगु इलय् वंगु स्वन्हु न्ह्यः निसें पोखरा-जोमसोमया उडान मदिक्क वा वयाच्वंगु कारणं अवरुद्ध जूगु दु ।
वां प्रभावित यायेवं न्हिं छगू दर्जनं मल्याक उडान रद्द जुयाच्वंगु दुसा सलंसःया ल्याखय् यात्रुत विमानस्थलय् तुं पियाच्वनेमाःगु अवस्था वःगु दु । पोखराय् तसकं वा वयाच्वंगु कारणं जोमसोम जक मखु येँ-पोखराया उडान नं प्रभावित जूगु दु ।
मुक्तिनाथ वनीपिं यात्रुत अप्वयेवं सीता अग्नि व यती एअरलाइन्सं न्हिछिया छगू दर्जन धइथें उडान याना वयाच्वंगु दु । विमानस्थल स्रोतया कथं वां प्रभावित जुइवं वंगु स्वन्हु प्यन्हु न्ह्यः निसें बांलाक पोखरा रुटया उडान जुइ मफयाच्वंगु खः ।
वंगु शुक्रवाः निसें उडान रद्द याये मालाच्वंगु खःसा म्हिगः आइतवा तक नं उडान नियमित जुइ फयाच्वंगु मदु । वं बांमलाक प्रभावित यायेवं वंगु शुक्रवाः झिगू शनिवाः च्यागू व म्हिगः आइतवाः गुंगू उडान स्थगित जूगु दु ।
