नेपालय् नं स्वाइन फ्लु
अमेरिकां नेपाःलय् विपं स्वम्हेसिके स्वाइन फ्लु लुइकूगु दु । हनिमय्न्यंक महामारिया कथं फैलेजूगु स्वाइन फ्लु सोमवाः नेपालय् नं लूइकूगु खः ।
अमेरिकां कतारया दोहा जुया नेपाः वःपिं छगू हे छेँजःया स्वम्ह दुजःयात स्वाइन फ्लुया एच.वान.एन.वान. भाईरस लुइकूगु खँ ईपिडीमियोलोजी व रोग नियन्त्रण महाशाखां धाःगु दु ।
सोमवाः येँय् छगू पत्रकार सम्मेलन यानाः महाशाखाया प्रमुख शैलेन्द्र उप्रेतीं पाण्डेमिक इञ्फ्लुएञ्जा एच.वान.एन.वान. लुइकूगु धयादिल । उमित महाशाखां थःगु नियन्त्रणय् कयाः एच.वान.एन.वान. नियन्त्रणया निंतिं देयेकूगु उपचारकक्षय् विशेष निगरानी तयातःगु दु ।
जुन २१ तारिखया न्हि नेपा: दुहावंपिं भाईरस पाखें प्रभावितत ४४ दँया मिजं, ३८ दँया मिसा व उमि ८दँया काय् धकाः जानकारी ब्यूसां उमिगु थप परिचय धासाः गोप्य तयातःगु दु ।
आः तक स्वाइन फ्लु पाखे हनिमय्या ११३ देय्या ६०द्वं स्वया अप्वं मनूत प्रभावित जुइधुंकूगु दुसाः २६३म्ह थ्वहे भाईरसया ल्वचं सी धुंकूगु दु ।
