प्रचण्डया प्रस्ताव पारित
याकनं हे माओवादी नेतृत्वया राष्ट्रिय मंकाः सरकार : प्रचण्ड
एकीकृत नेकपा (माओवादी)या पोलिट्ब्यूरोया बैठकं अध्यक्ष पुष्पकमल दाहाल 'प्रचण्ड'या राजनीतिक प्रतिवेदन संशोधन सहित पारित याःगु दु ।
सोमवाः सुथय् निसें कुपण्डोलया मजदुर ज्याकूथी ज्वंगु बैठकय् अध्यक्ष प्रचण्डं पोलिट्ब्यूरो दुजःतय् न्ह्यसःया लिस बीगु झ्वलय् दुजःतय्सं ल्ह्वंगु विषययात दुथ्याकेगु प्रतिबद्धता प्वंकेवं प्रतिवेदन सर्वसम्मतं पारित याःगु खः । प्रतिवेदनयात केन्द्रीय समितिं पारित यायेवं सार्वजनीक याइगु खँ माओवादी प्रवक्ता दीनानाथ शर्मां जानकारी बियादिल ।
अध्यक्ष प्रचण्डया राजनीतिक प्रतिवेदनय् नागरिक सर्वोच्चता, माओवादी नेतृत्वया राष्ट्रिय मंका: सरकार गठन, न्हूगु संविधान निर्माण, शान्ति प्रकृया विषयत दुथ्याकातःगु दु ।
बैठक लिपा पत्रकार सम्मेलन यानाः माओवादी अध्यक्ष प्रचण्डं याकनं हे माओवादी नेतृत्वय् राष्ट्रिय सहमतिया सरकार गठन जुइगु दाबी यानादिल । वयेकलं आःया सरकारयात कठपुतली सरकार जूगु धासें माओवादीं थ्व सरकारय् ब्वति मकाइगु धयादिल ।
माओवादी जनर्वगीय संगठनया ज्याकूथी कुपण्डोलय् असार २ गते निसें न्ह्यानाच्वंगु माओवादी पोलिट्ब्यूरोया बैठकं 'शान्ति, संविधान, रष्ट्रिय स्वाभिमान, नागरिक सर्वोच्चता व राष्ट्रिय मंकाः सरकार' धइगु कार्यदिशा पारित यासें थौं क्वचाःगु दु ।
