सुरक्षा निकाय प्रभावकारी देयेकीगु
प्रधानमन्त्री माधवकुमार नेपालं नागरिक सुरक्षाया निंतिं सुरक्षा निकाय प्रभावकारी देयेकीगु खँ धयादीगु दु ।
नागरिक व्यवसायी साजालया प्रतिनिधितयसं सरकारयात शान्ति सुरक्षा बांलाकेत थंज्याःगु खुगू बुँदे माग तया ज्ञापन पौ लःल्हायेगु झ्वलय् प्रधानमन्त्री नेपालं दक्वं दलतनाप सहलह याना माग पूवंकेगु प्रतिबद्धता प्वंकादिल । प्रधानमन्त्री नेपालं शान्ति सुरक्षा कायम यायेत गृहमन्त्रीयात नं निर्देशन बीधुंकूगु धासें अपराध नियन्त्रण यायेत सरकार लिमचीलिगु ढृढता प्वंकादिल । वयेकलं सरकारयात जक मखु प्रतिपक्ष दलयात नं जिम्मेवार देयेकेगु पाखे केन्द्रीत जुइत नागरिक समाज नाप इनाप यानादिल ।
साजालं प्रधानमन्त्रीयात शान्ति सुरक्षा तत्काल बहाली यायेमाःगु, दण्डहिनता तुरुन्त अन्त यायेमाःगु, संविधान निर्माणया ज्यायात प्राथमिकताया साथ न्ह्याकेमाःगु, मूल्यवृद्धि व अभाव जुइ मबीगु न्यूनतक जीवनयापन यायेत नागरिक हक अधिकारया प्रत्याभूति यायेमाःगु, राजनीतिक समस्यात पहिचान सहित राष्ट्रिय हितयात दृष्टिगत याना असहमत पक्षत नाप वार्ताया माध्यमं समस्या समाधान यायेमाःगु, शान्तिपूर्ण आन्दोलनया अधिकार सुनिश्चित याना जनस्वास्थ्य व वातावरणय् प्रतिकूल असर लाइगु गतिविधि बन्द यायेगु कानूनी शासनया प्रत्याभूति यायेमाःगु माग सहितया ज्ञापन पौ लःल्हाःगु खः ।
