अप्वयाच्वंगु अपहरण व अपराध

छात्रा ख्याती श्रेष्ठयात अपहरण यानाः हत्या याःगु घटना सार्वजनिक जुइसातकि राजधानीइ अपहरण व उकिया वापत फिरौटी फ्वनेगु ज्या गुलि तच्वयेक न्ह्यानाच्वन धइगु खँया ग्यानापुगु किपा थन पिहां वःगु दु । राजधानी लगायत तराईया थीथी व्यापारिक शहरय् च्वनाः व्यवसाय यानाच्वंपिं उद्योगी व्यापारीतय्त निशाना दयेकाः थौंकन्हय् संगठित अपराध याईपंसं अपहरण यायेगु ध्यबा फ्वनेगु व मबिल धाःसा स्यानाः वांछ्वया बीगु ज्या यानाच्वंगु दु । तर देय्या गृह प्रशासनं धाःसा अज्याःपिं संगठित अपराधीतय् सँ छपु हे संके फयाच्वंगु दु । थ्व तसकं दुःखदायी खँ खः । प्रहरी व गृह प्रशासन गुलि निकम्मा जुयाच्वन धइगु खँ देशय् जूगु निगू प्यंगू अज्याःगु घटनातय्सं हे पुष्टि यानाच्वंगु दु ।

तर प्रहरी व गृह प्रशासन निकम्मा जूगुया दोष शुद्ध रुपं प्रहरीयात जक बियां धाःसा मगाः । प्रहरी निकम्मा जूगुया मेगु मुख्य कारण राजनीतिक पार्टी व देय्या राजनीति खः । राजनीति स्थिर मजूगु कारणं अपराध प्रवृत्तिया मनूतय्सं माक्व लबः कयाच्वंगु दु । उखे अज्याःगु अपराध याईपं मनूत नं सामान्य अपराधी जक मखुसें राजनीतिक पार्टीतय्सं हे संरक्षण बियातःपिं लानाच्वनीगु । गुकिं यानाः प्रहरीं उमित थौं ज्वंसा कन्हय् हे त्वःता छ्वयेमालीगु अवस्था वइगु । थुकिं यानाः छखे ला अपराधी ज्वनेत हे प्रहरी ग्याः । मेखे ज्वँ हे ज्वंसां उमित कारवाही हे याके बीगु मखु । बरु छुं हे मयाःसा याउँसे च्वंगु ज्या जुल । उकिं देशयात थ्व अवस्थां मुक्त यायेगु खःसा राजनीतिक पार्टीतय्सं हे प्रतिवद्ध जुयाः पलाः च्वयेकेमाःगु आवश्यकता दु ।

More Stories Like this