सन् '१७ सकसितं त्वनेगु लः चुनौती : प्रम
येँ / (सन्ध्या टाइम्स) सन् २०१७ तक फुकसितं त्वनेगु लः थ्यंकेगु ज्या चुनौतीपूर्ण जूगु खँ प्रधानमन्त्री माधव नेपालं धयादीगु दु । थौं सुथय् दक्षिण एसियाली लः संकलन सम्बन्धी गोष्ठीया उलेज्या यानादिसें वय्कलं उगु बिचाः प्वंकादीगु खः । लःया समस्या ज्यंकेत फुक्कं राष्ट्र जानाः न्ह्यायेमाःगु बिचाः नं वय्कलं प्वंकादीगु दु ।
ज्याझ्वलय् न्ववायेगु झ्वलय् वय्कलं वर्तमान सरकारया मू प्राथमिकता न्हूगु संविधान दयेकेगु व शान्ति प्रकि्रयायात निष्कर्षय् थ्यंकेगु खँ कनादिसें वय्कलं कानुनी राज स्थापना यायेगु निंतिं सरकारं कुतः यानाच्वंगु खँ नं कनादीगु दु ।
न्हू दयेकीगु संविधानय् जनताया सुझाव व गुनासोयात सरकारं संवोधन यायेगु खँ कनादिसें जनचाहना कथं ज्या यायेत थः कटिवद्ध जुयाच्वनागु खँ नं कनादीगु दु ।
ज्याझ्वलय् वय्कलं छिमेकी राष्ट्र लिसेया सम्बन्धयात सुदृढ यानाः न्ह्याः वनेगु खँ नं कनादिल । स्वन्हु तक न्ह्याइगु सम्मेलनं काठमाडौं घोषणापत्र नं जारी याइ ।
