नेपाल भ्रमण दँय् यौन व्यवसायी आशावादी
ख्वप / (सन्ध्या टाइम्स) सरकारं घोषणा यानातःगु निक्वःगु नेपाल भ्रमण दँ २०११ पाखें ख्वपया जःखः च्वंगु थीथी जिल्लाय् यौन व्यवसाय याईपं मनूतय्सं थःपिनि व्यवसाय थहां वइगु खः लाकि धकाः आशा यानाच्वंगु दु । थीथी कारणं यानाः देय्या पर्यटन व्यवसाय ध्वस्त जुयाच्वंगु इलय् आः यौन पर्यटनपाखें जूसां थःपिनि व्यवसाय च्वन्ह्याइगु खः लाकि धकाः थुमिसं आशा यानाच्वंगु दु ।
यौन पर्यटनया लागिं ख्वप दुने हे वईपं पर्यटकतय् ल्याः तसकं म्हो जक दुसां ख्वपया जःखः नगरकोट वनेपा धौख्यः आदि लागाय् वईपं पर्यटकतय् ल्याः धाःसा अप्वः दु । तर अज्याःपिं पर्यटकतलिसे स्वापू तयाः ज्याखँ मिले यायेगु ज्या धाःसा ख्वप दुने हे च्वनाः नं तयार यायेगु ज्या जू । थौंकन्हय् अज्याःगु ज्या पटक्क हे जुयाच्वंगु मदुसा आः वइगु नेपाल भ्रमण दँय् थ्व ज्या च्वन्ह्याइगु खः लाकि धइगु आशा जुयाच्वंगु दु ।
खास यानाः नगरकोट, धौख्यः, वनेपा लागाय् पर्यटक ज्वना वनीपिं यौन व्यवसायीतय्सं ख्वपय् सम्पर्क मिले यायेगु ज्या जक याइगु खः । ख्वप दुने हे धाःसा अज्याःगु ज्यायात खास हे थाय् बियातःगु मदुसां छुं छुं होटल दुने यौन व्यवसाय जुइगु जानकारी धाःसा सूत्रं बिउगु दु । तर जूसां उकियात व्यावसायिक हे रुपं न्ह्यःने यंकेगु अवस्था धाःसा मदु । उकिं नेपाल भ्रमण दँया झ्वलय् यौन पर्यटनयात व्यावसायिक रुपं हे न्ह्यःने यंकेमाः धकाः उमिसं सः तयाच्वंगु खँ नं सूत्रंतय्सं धाःगु दु ।
