शान्ति सुरक्षा कायम यायेत न्हूगु योजना : गृहमन्त्री

गृहमन्त्री भीम रावलं देशय् शान्ति सुरक्षा कायम यायेत न्हूगु योजना ह्येत्यनाःगु खँ धयादीगु दु ।

शनिवाः एमालेया येँ-अछाम सम्पर्क माञ्चं याःगु ज्याझ्वलय् वयेकलं देशय् सुरक्षा स्थिति बांलाकेत सरकार लगेजुयाच्वंगु धासें आपराधिक गतिविधि याइपिं न्हाम्हेसित नं सरकारं कारवाही याइगु धयादिल । वयेकलं सुरक्षा व्यवस्था बल्लाकेत एकीकृत माओवादीयात ग्वाहालि यायेत नं इनाप यानादिल ।

अथेहे थौं हे गृहमन्त्री रावलं येँया पुतलीसतकं अपहरण यानाः स्याम्ह ख्यती श्रेष्ठया छेँजःयात नापलानाः घटना प्रति दुःख प्वंकादिल । उगु ईलय् वयेकलं सरकारं ख्यातिया हत्यारायात कडा कारवाही यायेगु प्रतिवद्धता नं प्वंकादिल ।