एकीकृत माओवादी केन्द्रीय दुजः हमाल नापं स्वम्हेसिनं पार्टी परित्याग
एकीकृत नेकपा (माओवादी)या केन्द्रय दुजः टीकाविक्रम हमाल समित स्वम्ह नेतात मणि थापाया पुर्नगठित नेकपा माओवादी संयोजन समितिइ प्रवेश याःगु दु ।
शनिवाः येँय् एकीकृत नेकपा (माओवादी)पाखें थापाया पार्टीइ प्रवेश याःगु दुजःतय्त लसकुस यायेत याःगु ज्याझ्वलय् संयोजन समितिया अध्यक्ष मणी थापां एकीकृत माओवादीलय् दक्षिणपन्थी विचलन वःगु द्वपं बियादिल । वयेकलं एकीकृत माओवादी दुने विस्तारवाद, जुजुवादी व सुधारवादीया जमात दुहांवःगुलिं क्रान्तिकारी धुव्रीकरणया आवश्यकता जूगु धयादिल । वयेकलं एकीकृत माओवादीं शान्ति सम्झौता मार्फत जनयुद्धयात धोका ब्यूगु धासें थःपिंसं जनयुद्धया भावनायात निरन्तरता बीगु नं धयादिल ।
एकीकृत माओवादीया केन्द्रीय दुजः टीकाविक्रम हमाल, नेपाल शोषित पीडित जनसंरक्षणया अध्यक्ष गोविन्दिसंह महरा व स्वतन्त्र वामपन्थी रक्ति लामां माओवादी संयोजन समिति प्रवेश यानादीगु खः ।
