पाकिस्तानी विदेश सचिव येँय्
पाकिस्तानया विदेश सचिव सलमान बसिर स्वन्हुन्यंकया नेपाः भ्रमणया निंतिं शनिवाः येँय् थ्यंकादीगु दु ।
विदेश सचिव बसिरयात त्रिभुवन अन्तर्राष्ट्रिय विमानस्थलय् वयेकया समकक्षी पराष्ट्र सचिव ज्ञानचन्द्र आचार्यं लसकुस यानादीगु खः । विमानस्थलय् संचारकर्मीत नाप खँल्हाबंला यानादिसें विदेश सचिव बसिरं थःगु नेपाः भ्रमण नियमित मैत्री भ्रमणय् जूगु धासें वयेकलं नेपाः नाप नियमित सहलहया निंतिं थः नेपाः वयागु धयादिल ।
स्वन्हुन्यंया नेपाः भ्रमणया झ्वलय् वयेकलं प्रधानमन्त्री माधवकुमार नेपाल, परराष्ट्रमन्त्री सुजात कोइराला, पाराष्ट्र सचिव आचार्य लगायात नेतातय्त नापलाइगु खँ पाकिस्तानी दुतावासं पिथंगु विज्ञप्ति न्ह्यथंनातःगु दु ।
छवाः न्ह्यः जक भारतीय विदेश सचिव शिवसंकर मेननया नेपाः भ्रमण लिपाः पाकिस्तानी विदेश सचिवया थ्व भ्रमणयात राजनीतिक ख्यलय् अर्थपूर्णरुपं काःगु दु ।
