माओवादीयात इमान्दार जुइत प्रधानमन्त्रीया इनाप
प्रधानमन्त्री माधवकुमार नेपालं शान्ति प्रकृया क्वचायेकेत व संविधान निर्माण ईलय् हे यायेत माओवादीया इमान्दार जुइत इनाप यानादीगु दु ।
शनिवाः गोठाटार काँडाघारी च्वंगु गान्धी आदर्श उच्च माध्यमिक विद्यालयया न्हूगु भवन उल्लेज्या यायेगु झ्वलय् प्रधानमन्त्री नेपालं संसद अवरुद्ध यायेगु ज्यां शान्ति प्रकृया व संविधान निर्माण ज्याय् असर लिइगुलिं थुकी इमान्दार जुइत माओवादीया इनाप यानादिल । वयेकलं दक्वं समस्या समाधान सहमति कथं यायेफइगु धयादिल ।
अथेहे प्रधानमन्त्री नेपालं माओवादी अध्यक्ष पुष्पकमल दाहाल 'प्रचण्डं' संविधानसभा भंग यायेगु षड्यन्त्र जुयाच्वंगु धकाः ब्यूगु अभिव्यक्तिया प्रतिवाद यासें अज्याःगु ज्या गनं जुयाच्वंगु दुसाः व माओवादी स्वयमं यानाच्वंगु द्वपं बियादिल ।
थौं हे एमाले गां कमिटी गोठाटारं याःगु बधाई तथा शुभकामना ज्याझ्वलय् न्ववासें प्रधानमन्त्री नेपालं हत्या, अपहरण, भ्रष्टाचारीयात सरकारं गुबलें नं माफी मबीगु खँ धयादीगु दु । देसय् आपरिधिक गतिविधि याइपिं न्हाम्हेसितं नं कडा कारवाही यायेत सरकार कटिबद्ध जूगु धयादिल । नापं वयेकलं छुं न्हि न्ह्यः अपहरण यानाः स्याम्ह ख्यती श्रेष्ठया हत्यारायात नं कडा कारवाही याइगु व उकीया निंतिं सरकार न्ह्याःगु पलाः ल्ह्वनेत नं तयार दुगु धयादिल ।
