यलया चापागाउँलय् कर्फ्यु
मचा अपहरणया खँयात कयाः विवाद अप्वयेवं स्थानीय प्रशासनं चापागाउँलय् कर्फ्यु आदेश जारी याःगु दु । प्रशासनं शुक्रवाः सनिलयया खुताः ईलं निसे कन्हय् सुथय् प्यताः ई तक कर्फ्यु तःगु दु । स्थानीय प्रशासनं सरस्वति मावि चापागाँउ नं ५ सय मिटर तक, पेडेगाँउ निसें चापागाँउ पेट्रोल पम्प तकया ५ सय मिटर क्षेत्रय् ककक आदेश जारी याःगु खः ।
शुक्रवा सुथय् मचा अपहरण यावपिंत स्थानीयवासीतय्सं दायेवं अन तनाव उत्पन्न जूगु दु । लिपाः प्रहरीं घटनाय् हस्तक्षेप यानाः निम्ह अपहरणकारीतय्सत पाटन अस्पतालय् वास याकेत यंकूगु खसाः स्थानीयवासीतय्सं प्रहरीं अपहरणकारीतय्त संरक्षण ब्यूगु धासें चापागाँउलय् च्वंगु प्रहरी ज्याकू घेराउ याःगु खः । स्थानीवासी व प्रहरी दथुइ थ्वहे खँयात कयाः न्हिच्छि तनाव जूगु खसाः तनाव कम मजूगुलिं स्थानीय प्रशासनं कर्फ्यु तःगु खः ।
अपहरणया कुतः यापिं अमृत भुषाल व दुर्गाबहादुर महर्जनयात स्थानीयवासीतय्सं प्रहरीं यंका: संरक्षण ब्यूगु धासें सार्वजनिक यायेत माग याःगु दु ।
