कन्हय् जाउलाख्यलय् भोटो क्यनीगु
यल / (सन्ध्या टाइम्स) स्वनिगःया दक्कलय् ताःहाकूगु जात्रा बुंगः द्यःया रथ सालेगु जात्राया झ्वलय् अन्तिम चरणया जात्रा कथं कन्हय् सनिलय् जाउलाख्यलय् भोटो क्यनीगु जूगु दु । थगुने नं रथ क्वदःगुलिं थुकथं हे असारं जात्रा लावंगु खःसा थुगुसी नं असारया बछि थ्यनालिं हे तिनि जक प्वाकलं क्यनीगु जूगु दु ।
म्हीग बुधवाः बहनी जाउलाख्यलय् बुंगः द्यःया रथ थ्यनेवं जाउलाख्यः याः न्याःगु खःसा वयां प्यन्हु लिपा भोटो क्यनीगु चलन कथं थौं सनिलय् भोटो क्यनीगु ज्याझ्वः दु । थगुनेनिसें भोटो क्यनीगु इलय् राष्ट्र प्रमुखया हैसियतं राष्ट्रपति बुंगः द्यःया भोटो क्यनीगु ज्याझ्वः स्वःझाःगु खःसा थुगुसी नं निक्वःखुसी राष्ट्रपति डा. रामवरण यादव उगु ज्याझ्वलय् ब्वति कयादी ।
