सरकारया विकल्प सोचे मयाये : सुजाता
येँ / (सन्ध्या टाइम्स) सरकारया विकल्प सोचे मयायेत परराष्ट्र मन्त्री सुजाता कोइरालां धयादीगु दु । थौं सुथय् सुजाता कोइराला परराष्ट्र मन्त्री जूगु लसताय् कांग्रेसया कार्यकर्तातय्सं ग्वसाः ग्वःगु चियापान ज्याझ्वलय् वय्कलं उगु खँ धयादीगु खः ।
वय्कलं वर्तमान सरकारया संविधान निर्माण व शान्ति प्रक्रियायात निष्कर्षय् थ्यंकेगु बाध्यात्मक परिस्थिति गठन जूगु खँ धयादिसें थःपिनि कार्यकालय् हे संविधान दयेकेगु ज्या क्वचाइगु खँ नं कनादीगु दु ।
वयकलं सहमति व सहकार्यया राजनीतिइ फुक्कं राजनीतिक पार्टीयात वयेत इनाप यानादिसें माओवादीयात नं थ्व सरकारय् वयाः शान्ति प्रक्रियायात निष्कर्षय् थ्यंकेत इनाप यानादीगु दु ।
संविधान दयेकाः निर्वाचन मार्फत न्हूगु सरकार मदयेकूतले थःपिनि सरकारया विकल्प सोचे मयायेत इनाप यानादिसें वर्तमान सरकार क्वःथलेत गुगुं नं कथंया ज्या मयायेत नं माओवादीयात इनाप यानादीगु दु ।
