न्याद्वः लडाकु जक सेनाय् समायोजन याये फइ : प्रम
येँ / (सन्ध्या टाइम्स) प्रधानमन्त्री माधव नेपालं माओवादीया न्याद्वः लडाकुतय्त जक नेपाली सेनाय् समायोजन याये फइगु खँ धयादीगु दु ।
वय्कलं बेलायतया छगू अनलाइन साचार संस्था रोयटस्रयात अन्तर्वार्ता बीगु झ्वलय् उगु खँ धयादीगु खः । 'क्वःछिनातःगु मागदण्ड पूवंकूपिं व नेपाली सेनाया निंतिं योग्य जूपिं न्याद्वः लडाकुयात जक सेनाय् समायोजन यायेफइ' वय्कलं धयादिल ।
वय्कलं माओवादी लडाकुया भविष्य संविधान दयेके न्ह्यः हे क्वःछीगु खँ नं धयादीगु दु ।
प्रम नेपालं ल्यं दुपिं लडाकुतय् निंतिं वैकल्पिक रोजगारीया व्यवस्था याये फइगु बिचाः नं प्वंकादीगु दु ।
माओवादी लडाकुतय् भविष्य निर्धारण मजुल धाःसा संविधासभाया ज्याय् तकं पंगः वइगु खँ कनादिसें प्रम नेपालं थौंकन्हय् नेपालय् न्ह्यानाच्वंगु शान्ति प्रकि्रया अवरुद्ध जुयाच्वंगु खँयात नं स्वीकार यानादीगु दु ।
माओवादीं सरकार त्वःतेधुंकाः शान्ति अवरुद्ध जुयाच्वंगु दु धयादिसें वय्कलं माओवादीं शब्दय् जक शान्ति प्रकि्रया प्रति प्रतिवद्धता प्वंकूसां नं व्यवहारय् मिछंगु अवस्था ब्वलंकाच्वंगु द्वपं नं बियादीगु दु ।
प्रम नेपालं माओवादी लडाकुया पुनस्र्थापना २००९ दुने हे जुइगु खँ नं कनादिसें उकिया निंतिं थःगु नेतृत्वया सरकारं कुतः यानाच्वनागु दावी नं यानादीगु दु । वइगु दँया जेठ तक संविधान दयेकेगु ज्या क्वचाइगु दावी नं प्रम नेपालं यानादीगु दु ।
