सजनीया याकः कला ब्वज्या

येँ / (सन्ध्या टाइम्स) इचंगु च्वंम्ह सजनी श्रेष्ठं मौलिक रुपं तयार यानादीगु 'गणेश' विषयया चाया कलाकृतिया ब्वज्या थनया नेपाल आर्ट काउन्सिल ग्यालेरी बबरमहलय् न्ह्यानाच्वंगु दु । छवाःयंकं जुइगु उगु ब्वज्या नेपाल उद्योग वाणिज्य महासंघया अध्यक्ष कुशकुमार जोशीं त्वाःदेवाय् मत च्याकाः उलेज्या यानादीगु खः । ज्याझ्वलय् वय्कलं नेपाःया संस्कृति पिज्वइ कथंया कलाकृतित तयार यानाः उकियात व्यवसायीकरण यायेगुपाखे ध्यान तयेमाःगु खँ कनादिल । छवाःयंकं जुइगु उगु ब्वज्या उलेज्या ज्याझ्वलय् वरिष्ठ कलाकार गोपाल कलाप्रेमी श्रेष्ठं कलाकार सजनी श्रेष्ठया चाया कलाया बारे विस्तृत जानकारी बियादीगु खः । ज्याझ्वलय् सिर्जना आर्ट ग्यालेरीया अध्यक्ष बैकुण्ठमान श्रेष्ठ व मधुरिमा कला केन्द्र व सांस्कृतिक संस्थानया अध्यक्ष संगीतकार प्रदीप बम्जनं फुक्कं सिर्जना म्वानाच्वनीगु कारणं सिर्जनाया थःगु हे महत्व दइगु खँ कनादिल । ज्याझ्वलय् कलाकार मय्जु सजनी श्रेष्ठं थःगु कला यात्राया बारे कनादीगु खः ।