सम्पर्क भाषाया खँय् थिनंनिसें वहस
येँ / (सन्ध्या टाइम्स) सांस्कृतिक तथा सामाजिक ऐक्यवद्धताया आधार निर्माण समितिं संविधानसभाय् न्ह्यब्वःगु मस्यौदा बारे थिनंनिसें सहलह न्ह्यायेत्यंगु दु । वंगु सोमवाः समितिपाखें थःपिनि मस्यौदा न्ह्यब्वःगु खः ।
मस्यौदाय् माओवादी सभासद्तय्सं 'सशस्त्र द्वन्द्व' धइगु खँग्वःया पलेसा 'जनयुद्ध' खँग्वः न्ह्यथनेमाःगु माग यासें बिस्कं मत तःगु दुसा उखे मधेशवादी दलतय्सं नं हिन्दी भाषायात राष्ट्रिय भाषा कथं न्ह्यथनेमाः धासें बिस्कं मत दर्ता याकूगु दु । थिनंनिसें न्ह्याइगु सहलह ज्याझ्वलय् थ्व निगुलिं विषययात कयाः वहस जुइगु खँ धाःगु दु । थिनंनिसें असार १८ गते तक मस्यौदायात कयाः सहलह जुइ । उखे ताः इलंनिसें अवरुद्ध जुयाच्वंगु संसदया बैठक नं थौं च्वनेत्यंगु दु । तर माओवादी अवरोधया कारण थौं नं सदन च्वने फइगु स्थिति धाःसा मदुनि । राष्ट्रपति बारे माओवादीं हयेत्यंगु संकल्प प्रस्ताव बारे सहलह जुइमाः धकाः माओवादीं अडान कयाच्वंगु दुसा कांग्रेसं उकिया विरोध यानाच्वंगु दु ।
