सूर्यविनायक जंगलय् चिडियाखाना दयेकेगु प्रस्ताव
ख्वप / (सन्ध्या टाइम्स) ख्वपया प्राकृतिक सौंदर्यं जाःगु सूर्यविनायक जंगलय् खुल्ला चिडियाखाना दयेकेगु कुतः न्ह्याःगु दु । न्हापांनिसें हे जंगली जन्तु व पंक्षीतय् वासस्थान जुयाच्वंगु उगु लागाय् थौंकन्हय् सेनाया ब्यारेक तयातःगु दुसा आः उकियात हे सुधार यानाः चिडियाखाना दयेकेगु कुतः जूगु खः । उगु थासय् यलया जाउलाख्यलय् च्वंगु चिडियाखाना सिबें तःधंगु खुल्ला चिडियाखाना दयेकेगु कुतः जुयाच्वंगु खँ धाःगु दु । वन मन्त्रालयं उकियात स्वीकृत नं यायेधुंकूसां स्थानीय जनता व वन उपभोक्ता समितिनाप छुं स्वापू मतःगुलिं अवरोध वयाच्वंगु दु ।
मंगलवाः च्वंगु सूर्यविनायक सामुदायिक वन उपभोक्ता समितिया बैठकं उपभोक्तातय् हक कुण्ठित जुइकथं अन छुं कथंया निर्माण याये मजिउगु सुझाव बिउगु दु । वनय् आश्रित स्थानीय उपभोक्तातय्त नकारात्मक लिच्वः लाइकथं चिडियाखाना दयेके मजिउगु खँ नं उमिसं धाःगु दु । चिडियाखाना दयेके न्ह्यः अन विस्तृत अध्ययन याये मानिगु खँ नं धाःगु दु । सामुदायिक वन उपभोक्ता महासंघ ख्वपया अध्यक्ष केदार खड्कां नं स्थानीय उपभोक्तातय् हक अधिकार सुनिश्चित जुइगु खः मखु सीकाः जक चिडियाखाना बारे क्वछीमाः धयादिल ।
अथे हे उगु लागाय् लाःगु बालकुमारी महिला सामुदायिक वन तथा उपभोक्ता समिति गुण्डूया खुक्वःगु तःमुँज्या उलेज्याझ्वलय् वन उपभोक्ता महासंघ ख्वप जिल्लाया सचिव रामेश्वर बोहरां नं खुल्ला चिडिया खानाया बांलाःगु व बांमलाःगु पक्षया जानकारी वयेधुंकाः हे जक निर्णय जुइमाः धयादिल । गुण्डू गाविसया पुलांम्ह अध्यक्ष महेश बस्नेतं नं खुल्ला चिडियाखानाया बांलाःगु व बांमलाःगु खँया बारे व्यापक सहलह जुइमाःगु बिचाः प्वंकादिल ।
